شعراء السودان (شعراء بلادي)

بلادي أنـــــــــــا بلاد ناسا مواريثم

في أول شي ..كتاب الله

وحصان مسروج، وسيف مسنون حداه درع

كتاتيبم تسرج الليل مع الحيران

وشيخا في الخلاوي ورع

وكم نخلات تهبهب فوق جروفا الساب

وبقرة حلوبة تتضرّع وليها ضرع

بلدي أنا

تشيل الناس ، كل الناس وساع بي خير ولينا يسع

وتتدفق مياه النيل على الوديان

بياض الفضة في وهج الهجير بيشع

بلادي سهول ، بلادي حقول بلادي الجنة للشافوها

او للبره بيها سمع

بلادي ناساً تكرم الضيف

وحتى الطير يجيها جعان ومن أطراف تقيها شبع

بلادي الصفقة والطنبور وداراتن تنح بالليل

وبنوتن تحاكي الخيل

يشابن زي جدي الريل

وشبالن مكنتل فى طريفو ودع

بلادي أمان ، بلادي حنان وناسا حُنان

يكفكفوا دمعة المفجوع

ويبدّوا الغير على زاتم

يقسموا اللقمة بيناتم

ويدّوا الزاد حتن ان كان مصيرم جوع

يحبّوا الدار

يموتوا عشان حقوق الجار

يخوضوا النار عشان فد دمعة

وكيف الحال لو شافوها سايلة دموع!

ديل أهلي .. واللــــــــــه ديل أهلي

البقيف في الدارة وسط الدارة واتنبر

وأقول لي الدنيا. كل الدنيا ديل أهلي

عرب ممزوجة بي دم الزنوج الحارّة

ديل أهلي .. ديل قبيلتي لمّن أدور أفصل للبدور فصلي

أقول بعضي

ألاقيهم تسرّبوا في مسارب الروح

بقوا كولي

أسياد روحى والإحساس

وسافر في بحار شوقم زمــــان عقلي

أنا محل قبّلت ألقاهم معاي ، معاي زي ضليّ

أنا لو ما جيت من زي ديل كان أسافاي ، وا مأساتي وا زّلي

تصوّر كيف يكون الحال لو ما كنت سوداني...

وأهل الحارّة ما أهلي تصوّر

لو بإيدي ..
لو بإيدي كنت طوعت الليالي
لو بإيدي ..
لو بإيدي كنت زللت المحال
والأماني الدايرة في دنياي ماكانت محال
دي الإرادة ونحن ما بنقدر نجابه المستحيل
دي الإرادة والمقدر ما بنجيب ليه بديل
دي الإرادة أجبرتني في هواكم من قبيل

غصبا عني وغصبا عنك
انت حبيتني وهويتك
لو بإيدنا من زمان
كنت خليتني ونسيتك
والنهاية ..
انت عارف وانا عارف
لو بإيدي كان هديتك

أصلو حبي أقوى وأكبر من إرادتي
وانا حاسس في جحيم نارك سعادتي
والهيب البكوي في روحي
في ذاتي
هو إنت
قلبي دايرك
حبي عارفك
في شبابك في صباك
في جمالك في وفاك
في شبابك في وفاك
يا المسير وماك مخير
انت ياصابر عند الله جزاك

منو البقدر
يوصف لى مداين الشوق
دريبن وين ؟
وبشرح لىً
عن حالن
يكون زارن
يكون شافن
عديل بالعين
كتير...
من قبلنا فاتو
وفى درب الهوى ماتو
مافيهم فرد ويحيد
رجع فى يوم احدثنا
يونسنا .. يقول لينا الدرب بى وين؟
مداين الشوق !!!
قالو جوه ضباب
على لوح الزمان مقفول
طريقن خالى مامأهول
وبين المشية والجية
قوافل
طاشة ليها سنين
منو البقدر يوصف لى مداين ؟
مداين ما مداين الناس !!!
وحجابن غلاد وشُداد
ومن دونن سيوف القدرة
حارسة الباب
تقرب ليها
تلقى العين
تسافر فى درب مجهول
وترجع تانى من اول
وتبدا طريق
ماها بيوت
مفرقة فى التراب الساس
مابتمس بالايدين
ومابتنشاف بشوف العين
تحسها جوه جوه الروح
تعاين ليها بالاحساس
مدن قدر البحر ممدودة
لابتنعد ولا بتنقاس
هدير فى لجة المجهول
وقاع اللجة ياما .. حير القياس
بدور واحد فرد ويحيد
يكون زارن
وشافن شوف
شوف عديل بالعين
مداين شدت الركبان
وفاتو
على الدرب عايرين
مشدودين
ومشدوهين
لدار الغربة مشتاقين
وياما
شفتهن خايفين
على وصفن قديم
سمعوهو ما مثبوت
بانك يا مداين الشوق
ربيع خالد
خلود القدرة
لابيفوت ولا بيموت

قلبي الحابيك ما خان لياليك
ما ناسي الماضي ماتقول ناسيك
ما بدل حبو ابدا ماتنكر ليك
لكن الأشواك والنار حواليك
يانور العين
يانور العين انت وينك وين
في اللون الأسمر ذوبت شبابي
وعشقت الجنة وفي الجنة عذابي
صابر وبتألم والمر دا شرابي
ياحليل الراحو ياحليل احبابي
يا نور العين
يا نور العين انت وينك وين
الشعر الناعم بي عطرو اسرني
والوجه الناير بي نورو غمرني
عيونو النعسانة برموش تجرحني
خلتني متيم وين راحت مني
يا نور العين
يا نور العين انت وينك وين
انا والأنغام والعود في ايدي
بحكيلو حكايتي ويعيد ترديدي
واشكيلو همسة أو عذب نشيدي
ياما الأوتار تفضحني من ريدي
يا نور العين
يا نور العين انت وينك وين

سيرة ذاتية

أبو آمنة حامد

· من ابناء شرق السودان "مدينة هيا"

· اكمل دراستة الثانوية بمدرسة كسلا الاكاديمية

· خريج جامعة القاهرة

· عمل ملحقا ثقافيا لسفارة السودان بالقاهرة 74/1979م

· شاعر وصحفى معروف فى الساحة السياسية والأدبية

· من أبرز قصائده (جمال العرب) (لست وحدك) وشعرها الذهب

· من المؤمنين بالوحدة العربية هدفا وغاية ومصيرا

· له ديوان شعر بعنوان (شعرها الذهب) وناصريون نعم

كانت معى

كانت معى...

عمرى تجمع كله عند اللقاء الممتع

خطواتها وقع الحداء مموسقا فى أضلعى

وحديثها الممراح...

دوزنة تدغدغ مسمعى

اللحن فى الحرف الذي

فى ثغرها المتمنع

يا فرحتى بالكلمة السكرى ترف فلا أعى

لفى الضفيرة أو دعى..عمرى عليها مرتعى

يا موجة العطر المرف

على ربيع اضوع

بى شوق مغترب

الى وطن الشفاه الاينع

لملامس الخد الانيق

على المجال المترع

للحلمتين مسافر

بشراع نهد...مقلع

سمراء يا حلم الليالى الحمر

لا تتمنعى

النسك ليس سجيتى

لا تسرقى حريتى

للصدر آهات تضج

ولى أنا امنيتى

لا تلبسى ثوب العفاف.....

فلست أنت نبيتى !!

قديسة الاهواء ..؟

ويحك .. إن تلك مشيتى

للغير فاكهة العناق

ولى أنا انشودتى

تتدثرين بثوب راهبة وخاشعة

وانت خطيئتى

صونى عفافك للألى..

عرفوا مكانتك التى

أقسمت اطفيء فيك..فى

في نهديك..غضبة ثورتى

لن تهربى منى

فهذى (مشاتل) ليلتى !!

عم عبد الرحيم
محمد الحسن سالم حميد

فتاح يا عليم رزاق يا كريم صلى على عجل
همهم همهما
حصن للعباد وهوزز سبحتو ودنقر للتراب
هم فوق هم هما
صنقع للسما وكان في الجو في غيم
وكم نجمات بعاد .. وكان الدنيا صيف
لا قالتو كيف اصبحت كيف ..
لا لمست حنان ..
لا لمست وداد .. لا رمشة طريف
من قلب وفي زي ايام زمان ايام الدفي
كانت ماها في
كانت في المراح ..
شدتلو الحمار تحلب في الغنم ..
لــي شاي الصباحوالطير ما نضم ..
ما رسل نغم ..
عم عبد الرحيم اتوكل نزل
في المشرع لقى زملان الشقا
الجا من الجريف ..
الجا من الجبل ..
عل الناس بخير ..
صبح هاظرهم نقنق ناقرهم وغاظوه ونعل
وعم عبد الرحيم ما بخبر زعل
كل الناس هنا ما بتخبر زعل
تزعل من منو وتزعل في شنو
كل الناس حنان .. كل الناس صحاب .. كل الناس اهل ..
والماهم قراب قربهم العمل
الطاق اليطق
عشت ابو الزمل بالحال العليك بالفال بالامل
عم عبد الرحيم .. كت فتاح في يوم على ايدك تنوم على كيفك تقوم
لا دفتر حضور لا حصة فطور تقرع بالقمر تزرع بالنجوم
لكن الزمن دوار لابدوم
عم عبد الرحيم ماشي على الشغل
في الباب القديم انعارض تكل
تنشايح جراح ياما كيف الغسل
الدنيا ام صلاح تبدأ من التكل
من حجة صباح في حق الملاح
في اللبس الجديد ..
في القسط القديم .. وبيناتن عشم
في الفرج البعيد ..
امونة الصباح .. قالتو النعال والطرقن هرن ..
ما قالتو جيب ..
شيلن يالحبيب قشهن النقلتي والترزي القريب
بس يا ام الحسن طقهن ما بفيد
وانطقن زمن وان طق الزمن لازمك توب جديد
بي أي تمن ...
قصبا للظروف والحال الحرن
عشان يوم الرحول ما تنكسفي يوم...
لو جاراتنا جن مارقات لي صفاح ..
او بيريك نجاح ..
دا الواجب اذن ..
وايه الدنيا غير .. لمت ناس في خير او ساعة حزن
عم عبد الرحيم ياحر ماك حر
ياريت التمر ياريت لو يشيلكل تلات شهر
ولا ايام زمان كانت ما تمر
كان ما جاك هوان ما لاقاك ضر
كان لا ضقت ضيق .. لا انغرغر الصبر لا شابيت غريق
لا طوح فقر ..
وكان ما كان وكان اكسيك در ..
حكومات تجي وحكومات تغور
تحكم بالحجي بالدجل الكجور
مرة العسكري كسار الجبور
يوم قسم النبي تحكمك القبور
تعرف ياصبي مرة تلف تدور
ولا تقول بري او تحرق بخور
هم يالفنجري يالجرف الصبور
كل السقتو ما باقي على التمور
وارضك راقدة بور..
لا تيراب وصل ..
لا بابور يدور ..
والماهية اف عيشة هاك وكف
في هذا الزمن تف يا دنيا تف
يالعبد الشقي ما اتعودت شكي
لكن الكفاف فوقك منتكي
والسوق فيك يسوق حالاً ما بتسر
الا كمان في ناس فايتاك بالصبر
ساكنين بالايجار ... لا طين لا تمر
واحدين بالايجار ما لاقين جحر
سلعتهم الضراع والعرق اليخر
عمال المدن .. كلات المواني .. الغبش التعاني ..
بحارة السفن .. حشاشة القصوب .. الجالبة الحبال ..
الفطن الفرن .. الشغلانتو نار والجو كيف سخن ..
فرق شتى بين ...
ناساً عيشا دين ...
مجرورة وتجر
تقدح بالاجر ومرة بلا اجر
عيشهم كمهو وديشهم هان قدر
وناساً حالا زين ..
مصنع مصنعين
طين في طين وين
ما مرابا مر بارد همها
لا بعرق جبين ولا وشا يصر
عين والله عين .. كلها كمها وعزها هان قدر
دي الجنة ام نعيم دي الجنة ام قصر يا عبد الرحيم الا ورا القبر
لا تسرح كتر فتاح يا عليم
وان كان الفقر يا عبد الرحيم اشبه بالكفر
حكومات تجي وحكومات تغور
تحكم بالحجي بالدجل الكجور
مرة العسكري كسار الجبور
يوم قسم النبي تحكمك القبور
تعرف ياصبي مرة تلف تدور
ولا تقول بري او تحرق بخور
هم يالفنجري يالجرف الصبور
كل السقتو ما باقي على التمور
وارضك راقدة بور..
لا تيراب وصل ..
لا بابور يدور ..
نقرض للحمار ...
نقريضة الحمار لا تنسي النعال
الطر الخضار اللبس الجديد ..
تسريح السفر ..
للماشي الصعيد ماشي الديش نفر
والبال اشتغل ...
والبال اشتغل للابا ما يعيد الحول ما اشتغل
والبال اشتعل ...
السكة الحديد ياعمو القطر
ياعم عبد الرحيم قدامك قطر
وسال الدم مطر
وطارت دمعتين ونشايح وتر
ياطاحن الخبر ما بين القضا ومرحاقة القدر
الشدة ام دموع والدمع انهدر
ايدهم في التراب .. والعين في القطر
عارفين الحصل عارفين في حذر الخبر اليقين دوخ وانتشر
اطفال القرى وعمال الحضر
ادوهو الطيور ودنو البحر
انصاعد سحاب وندافق مطر
عم عبد الرحيم في الشارع عصر ..
للدار اليسار متفادي الكجر ..
عربية الكجر .. دورية الكجر ..
جفلت الحمار وطوح زي حجر ..
وعم عبد الرحيم اتلافا القطر ..
فتاح يا عليم سال الدم مطر ..
جرتق بالتراب منشور بكتاب
روشتة وجواب ماهية شهر
اورنيكين سهر جنب لبدة حمار مقطوعين ضهر
عم عبد الرحيم يا كمين بشر
صح الموت سلام ما يقشاك شر

» نساء رائدات من بلادي
» اغاني من شرق السودان
» حكام السودان
» جمهورية السودان
» السودان و البترول